|
|
|
|
|
| 關鍵字: |
|
| 行業種類: |
|
|
|
| 職位名稱: |
|
|
|
| Face Magazine Marketing Ltd |
| 查詢熱線 |
： |
2744 2938 |
| 傳真號碼 |
： |
2623 9000 |
| 電郵地址 |
： |
ecjobs@next media.com |
| 地址 |
： |
香港新界將軍澳工業村西駿盈街8號 |
|
|
|
 |
 |
2012年05月18日 |
|
 |
青雲路 : 22歲傑志女公關 化身萬能保母
如果你是本地足球擁躉或傑志球迷，一定對22歲的伍怡欣（Jessica）有所認識，每逢有大型足球活動或傑志出現的地方，必定看到其倩影，皆因她是傑志的項目及公關經理，更是班主伍健愛女，14歲已加入球會工作，凡事一腳踢，17歲已一人孭起大型比賽的宣傳活動，現時邊工作邊讀書，為了球會，甘願化身萬能保母，有傑志的地方，總離不開她。
致電約Jessica做訪問，那邊廂響起的是IDD電話，「我𠵱家喺加拿大返緊學，下個月尾先返，到時再約啦。」原來她仍在加拿大讀大學，今年年中才畢業，奇怪的是，傑志無論在香港或外地有活動，卻又會看到其蹤影。「我加拿大、香港兩邊走，只要一有假期或球會有event就會返香港，遇到球隊要去外地比賽，我都會專程飛埋過去打點。」
Jessica是傑志的項目及公關經理，名銜雖大，但她笑言自己是打雜一名，乜都要一腳踢，「我主力搞宣傳及推廣，每次有event，都要自己book場地、度rundown及搵嘉賓等，好似我哋每年會請外隊如巴塞、阿仙奴等嚟踢慈善賽，我都要去機場接機、跟進住宿餐飲等，仲要陪佢哋出席活動。」像訪問當日，Jessica便要充當司機，親自駕車接送兩位傑志球員到電視台做訪問，恍如保母一般。
除了傑志球員外，Jessica同時還要兼顧公司的足球學校、職業訓練員計劃等，非常忙碌，「最忙喺2010年世界盃時，我試過1日走8個event，要湊住啲球員同足球學校學生四圍出席電視台節目及商場活動，趕到飯都冇得食。」身兼多職，Jessica也曾壓力爆煲，晚晚躲在家中喊，為了減壓，她試過瘋狂進食辣食物及飲咖啡導致胃痛，「舊年5月搞掂咗維拉利爾嘅邀請賽後，第二日過馬路喺街暈低咗，後腦落地，好彩當時媽咪在場，即刻call白車入院。」
不學鋼琴寧做打雜
幸好去年哥哥亦加入球會幫手，處理內務事宜，而公司也聘請多了人手，才能幫輕她，「其實我好捱得，亦唔怕辛苦，唔介意假日開工同做通宵，因為我覺得學到嘅嘢，第時一定有用。」年紀輕輕的Jessica一早已很識諗，13歲自願到daddy的電腦公司幫手，14歲加入傑志，「以前每年暑假，屋企人會送我去唔同國家嘅音樂學院學鋼琴，一日要彈足8個鐘，好悶，之後我同屋企人反映，寧願留喺香港學嘢。」
那時純粹暑假當學嘢，沒有人工之餘，雖然貴為太子女，但做的也是打雜工作，沒有特權。「嗰時公司少人，大家都好忙，唔會因為你嘅身份而錫住你，乜都要做，最記得有次，我一個人攞住4百張慈善比賽嘅宣傳海報，搭地鐵去觀塘、搭火車去粉嶺，好重、好辛苦，之後daddy都話我做乜自己一個人去商場、贊助商度派海報，但我覺得自己做到，咪盡量去做囉。」
因為肯搏肯捱，daddy也漸漸讓她接手大型活動，到2007年，即17歲那年，Jessica便開始做兼職，月入約$5,000，她一個人孭起整個巴塞隆拿訪港比賽的宣傳活動及慈善晚會，雖然比賽於8月才舉行，但她於4月已開始籌備，結果影響當年會考成績。「當知道球會邀請到巴塞嚟香港，仲畀我負責成個event，我個心放晒喺比賽度，考電腦科嗰日，下午有個會開，我一路考試，一路睇住表，淨係想快手啲做完，趕住去開會。」
成功安排巴塞訪港
最終Jessica無法升上原校，被迫遠赴加拿大升學，但她認為值得。「嗰次係我第一次搞嘅大型活動，我一個人聯絡幾個機構、跟進贊助商、安排晒成個晚會，雖然中間遇到好多棘手事，好似喺球場內賣紀念品，要早兩個月攞准許證，我都唔識，成日過咗deadline先申請，結果要交好多文件去唔同部門再等批；即使係整banner，我唔知要預幾多個工作天，以為可以好快搞掂，不停咁撞板，都試過俾daddy鬧。」
但完成活動後的滿足感，把一切辛苦都遮蓋，「曾經聽過啲人話我咁細個，又係女仔，一定應付唔到咁大嘅event，所以一做完，聽到有人稱讚，真係好有成功感。」
正是這份滿足感以及可以幫輕daddy，成為她繼續做下去的原動力，「我細個成日跟住daddy去睇波，每次球隊輸波，都會忍唔住喊，慢慢被daddy感染咗，愛上睇足球，亦唔想佢咁辛苦，想幫佢分擔到工作。」為了球會，Jessica揀選讀心理學，認為有助與球員溝通，更打算再修讀運動心理學碩士課程；又因為經常要接待西甲球隊，而走去學西班牙文。
被邀拍廣告做MC
經Jessica多年的努力宣傳，令傑志近年知名度大增，吸引不少贊助商，如Cannon、Nike等，還有廣告商找球員拍剃鬚刀等廣告，「多咗人欣賞傑志，係因為球隊成績好咗，同埋我哋投放多咗資源去做宣傳，希望吸引番多啲人入場睇波，支持本地波同傑志，好似遲啲我會用球迷寫嘅歌，同球員拍番個MV做宣傳。」
為球隊爭取曝光同時，也為Jessica造就到不同發展，例如與球員一齊拍廣告、獲邀為報紙寫世界盃專欄，更在多個活動上擔任MC，「最初有活動搵我做MC，不知幾緊張，好似有次做世界盃event，輪到邀請嘉賓張堅庭上台時，先發現佢俾電視台捉住做訪問，惟有自己執生，不停諗嘢去講，拖足5、6分鐘等佢上台。」
這些經驗，對於還在學的她來說，非常難得，「我一直都想攞多啲工作經驗，擴闊自己嘅人脈，雖然呢幾年邊讀書邊做嘢好辛苦，但好值得。」今年畢業後，Jessica計劃留港讀碩士，但意外地，未必會繼續留在傑志，「有其他公司向我招手，其中仲有娛樂公司邀請我做幕後，𠵱家我仲考慮緊，雖然好鍾意球會，但都想趁年輕，出去闖吓，試多啲嘢。」
傑志隊長盧比度：Jessica好幫得手，又好玩得，大家好似朋友咁，我哋有咩事都會搵佢，例如去咩活動、着咩衫等。
傑志球員盧均宜：呢幾年Jessica幫球會搞多咗好多活動，又多咗贊助商，畀咗好多support球會，令我哋可以安心比賽。
後記：球場女神
在球場跟Jessica做訪問，除了傑志球員外，場內其他男性均向她行注目禮，連攝影師都讚她有星味，據知她出席活動曾被抽水，又有狂迷跟蹤，幸好有球員當護花使者，「佢哋個個當我妹妹咁，好保護我。」
如此靚女，想必有不少狂蜂浪蝶，Jessica即否認：「唔係喎，我𠵱家係單身，亦冇球員追求我。」轉頭某傑志球員爆料，指Jessica有不少傾慕者，可惜只敢暗戀，「佢係班主個女，大家邊敢追。」女神，就是可望而不可即。
點入行？
Jessica表示近年本地足球開始受到重視，商業味道也較重，許多球隊需要PR或行政方面的人才，幫助擴充及宣傳球隊，因此需求漸大。一般人想入行，有幾種途徑，包括熟人介紹，由球迷轉做職員等，還可以主動send email到各球會自薦。
經理 $20,000至$30,000起
6年以上經驗
高級行政人員$12,000至$20,000起
3年以上經驗
初級行政人員$12,000起
毋須經驗
|
|
|
|
|
|
|
